إلهنا هو الشخص الحقيقي اللي مليان تعزيات باقية ومستمرة .. مجداً ..

 فى مرة كان فى شخص فى شغلى .. كان بيجتهد بكل امكانياته انه يشوه صورتى .. كان عنده درجة رهيبة من الكراهية رغم مواقف كتيرة كنت بساعده فيها لغاية ما بتتحل ..

مواقف كتيرة بقدم فيها الخير والافضل قصاد الاساءة الواضحة .. يتجنن اكتر ان نظريته ان ده تمثيل للصلاح وانى مش كدة .. نظرية مش عارف يثبتها .. وكان يدور على مواقف ابشع يحاول يبين بيها للناس انى مش حقيقى زى ما هما شايفين ..

كنت مدرك تماما ان روح الكذب والتعصب له سلطان يملى اشخاص بأكاذيبه لدرجة ان الحق يبقى قدامهم .. ويقتنعوا انه تمثيل وكذب ..

لغاية ما جيه وقت هو اجهدنى تماما واكثر من الخطأ .. وساعتها قعدت مع نفسى وقولت لنفسى .. " على فكرة انا اقدر ما ساعدهوش تانى وكمان اعرف بسهولة اطلع اخطاءه اللى بحلها احيانا من غير ما اعرفه .. واقدر كمان بسهولة اكسره ولو استخدمت طريقته وده سهل جدا ها خليه يندم انه استمر لفترة طويلة يكعبلنى .. "

وفى اللحظة دى .. سمعت الرب بصوت واضح جدا جوايا .. بيقولى " تحب تنتقم وتاخد حقك .. ولا تسيبنى انا اخد حقك ؟؟؟ "

وفى اللحظة دى .. وقفت كل تفكيرى وابتسمت .. وقولتله يارب انت ناوى تاخد حقى .. لأ طبعا انا مش ها خده .. انت تاخد حقى يارب ..

ومن الوقت ده سقط منى قيد الغضب والضيق من اللى بيحصل .. ومن وقتها اخدت كل الاحداث بنفس الطريقة .. والرب فى مرة تانية .. قالى اللى عايز يتهكم عليك او يتكلم فى ظهرك سيبه علشان انا ها عرف اخد حقك كويس .. ومن وقتها وانا بسيب الرد للرب ..

عايز اقول ان الشخص ده .. حصلت احداث كتيرة .. ظهر فيها بشكل واضح كذبه وشره وتدابيره وكل الناس عرفت بكدة .. وظهر فيها سوء اخلاقه .. واهان ناس كتيرة بشكل واضح وحتى اصدقائه عرفوه بشكل واضح ..

وبعد ما كان بيحلم يكسرنى ويترقى .. ساب المكان بمشاكل كتيرة .. وانا اتحركت لمكانة افضل فى شغلى .. والناس عرفوا انى فعلا كنت حقيقي وحقى جالى بشكل واضح ..

عايز اقول .. الرب بيقول انه له النقمة وهو بيجازى ..

اوعوا تنفصلوا عنه وتتشوهوا علشان تاخدوا حقكم .. لأ خليكم معاه وافرحوا بيه واتعزوا واتشفوا بيه وسيبوه هو ياخد حقكم .. هو عادل وامين وحق ونور لا ظلمة فيه .. وده كفاية اوى .. 💪💪