إلهنا هو الشخص الحقيقي اللي مليان تعزيات باقية ومستمرة .. مجداً ..

 .

عايز اشارككم بإختبار مميز جدا حصل مع حد اعرفه والرب باركنا بيه وعلمنا حاجات كتيرة اوى ..

اعرف شخصية مميزة من الفيس .. وكل فترة كنا بنصلى مع بعض ونتواصل فى احاديث عن الرب وعمله ..

من فترة واحدة فى عيلتها كانت حامل وجيه ميعاد ولادتها .. فولدت .. لكن كان فى مفاجأة رهيبة .. بطن الام دى حصل فيها تحجر تام .. الامعاء مش بتتحرك الهضم ضعيف خالص .. وما فيش امكانية للاخراج .. والبطن مشدودة جدا ووارد يحصل فيها تسمم يتسبب فى موت الام دى فى اقرب فرصة ..

الدكاترة قعدوا يومين او ثلاثة .. بيدوا علاجات وقائية كتير ومش واصلين لحاجة خالص .. وبدأوا يشعروا بحيرة ..

فى الوقت ده اتواصلت معايا الشخصية المميزة دى .. وقالتلى يا محب هى الام دى ها تعيش ؟؟!!

شعرت بالارتباك جوايا .. المشهد اللى بتوصف صعب جدا جدا جدا ..

لكنى صليت جوايا انى يارب احس بمشاعرك واتملى بيها ..

فقولتلها .. انا ك محب حاسس بقلق وبفزع .. لكن اسمعى .. كمشاعر من الرب انا مليان سلام تماما .. الام دى فى ايد الرب وها تعدى بخير ..

قالتلى امين وانا مصدقة فى الرب وها كمل صلاة معاك .. قولتلها انتى بتصلى بالالسنة قالتلى اه .. قولتلها روحى وحطى ايدك بهدوء على بطنها وصلى لانى مشغول انك تعملى كدة .. قالتلى تمام وانا فعلا كنت بدأت اعمل كدة ..

نفس اليوم بالليل كنت بصلى علشان الام دى .. وشفت رؤية من ابسط الرؤى اللى شوفتها فى حياتى .. شوفت حوض مليان مياه كتيرة اوى واتفتحت السدادة بتاعته .. وبدأ يصرف المياه بدومات وبسرعة رهيبة ..

فرحت وقولت يارب اشكرك لانك بتطمنى تمم عملك .. وتمم مشاعرك اللى حطتها فى اعماقى من جهة الام المعذبة دى .. لكن اتفاجأت بمفاجأة لاقيت الرب بيملى روحى بإصرار انى لازم اتواصل مع الانسانة المصلية دى .. واقولها الرؤية دى ..

قولتله يارب اقول كدة على مسئوليتك انت الوضع حرج جدا جدا .. وممكن يكون هما هناك مش عندهم الايمان ده او فى معطلات عندهم .. وفى الاخر ها تحرجنى وانت كمان ها تبقى قولتلهم كلام ما تميش ..

لاقيت الرب بيقولى .. انت لازم تقولها .. لان فى اكاذيب كتير هناك ولازم الحق يسيطر والام دى فى خطر .. بعد جدال طويل مع الرب .. استسلمت .. واتصلت بيها وقولتلها قالتلى امين انا ها صلى معاك ..

تانى يوم بسألها ايه الاخبار؟؟ قالتلى الوضع اسوء .. انت متأكد يا محب .. وقلتلها ايوة انا عندى سلام تام والحوض ده ها يصرف ..

اليوم اللى وراها بكلمها ..قالتلى الوضع اصعب هى بتصوت وبتزعق وبس ..!! انت متأكد يا محب .. انا بصلى معاك .. قولتلها نفس الكلام اه متأكد والحوض ها يصرف ..

رابع يوم .. الاطباء طلبوا اشعة من كتير الحيرة .. عملوا اشعة .. الاشعة تقريرها وحيش جدا .. سوائل خارج الامعاء مختلطة بغازات .. مش متحدد مصدرها او درجة الضرر اللى الامعاء متعرضة له ..

بعتوا التقارير لجراح كبير .. قالهم دى لازم حالا تتنقل لمستشفى تانية .. ولازم يتم فتح البطن .. وعمل استكشاف سريع ودقيق لان اكيد فى قطع فى جدار القولون او الامعاء ..

كلمتنى تانى انت متأكد يا محب ؟؟ قولتلها اه متأكد .. وممكن الطبيب ده يفتح حاجة بسيطة ويلاقى الموضوع بسيط ويتقفل بغرزة خفيفة ..

بعد ما خلصت كلامى معاه بثوانى .. شوفت جوايا الامعاء دى بتخرج اللى فيها بشكل طبيعى مش بعملية ..

اتواصلت معاها .. وقولتها .. وانا عندى ايمان .. ان الرب ها يجمع السوائل دى جوة الامعاء وها تصرف تماما زى الحوض اللى شوفته .. وها تخرج وها تاكل وها تهضم .. والثقب ده يقفل ..

الحقيقة انا متأكد ان الكلمتين دول بإيمان مصدره الروح القدس لانى مش عارف انا قولتهم ازاى .. فى الظروف الصعبة دى ..

فى نفس اليوم بالليل .. كتبتلى يا محب .. الجراح بيقول ان فى حالات نادرة جدا .. ممكن الامعاء تسحب السوايل اللى حواليها وتتجمع وتسد الثقب وما تحتاجش لجراحة .. بس فى حالة واحدة .. اذا الام دى عرفت تاكل لمدة يومين وتهضم هضم طبيعى وتدخل التواليت بشكل طبيعى .. قولتلها امين كملى صلاة ..

بعد يومين .. اتواصلت معايا .. وقالتلى يا محب احنا روحنا البيت بدون اى عمليات كل حاجة صرفت تماما .. الام دى اكلت ودخلت التواليت .. وحياتها رجعت سليمة تماما .. هلليلويا ..

عايز اشجعكم .. ان الرب لما يطلب حاجة مننا لازم نطيعه .. ولما يأمر كلامه لازم بيتم ..

كل شخص مهم جدا فى موقعه .. لان لو الانسانة دى ما نقلتش لى الحدث ده .. كانت ممكن الام دى تدخل جراحة وتتبهدل وممكن القصة نهايتها كانت تبقى وحيشة جدا .. اوعى تكون سلبى انت فى مملكة النور .. ودورك تنقل الناس للنور مش تسيبهم ..

قد تكون الاحداث مستحيلة .. بس ده لا يمنع ابدا قدرة الرب .. لان الرب بيتحرك فى حيز اكبر ملايين المرات من المستحيل نفسه ..

كذب ابليس ممكن يمر حياة ناس .. لكن الحق اللى من الرب بيدمر كذب ابليس وبيطلق حياة الناس بمجد ..

وفى النهاية .. اخضع واتضع .. لان الرب يرفع المتضعين .. ويسقط امامه كبرياء رتب عملاقة لملائكة ساقطة فى الظلام ..

ولإلهنا كل المجد الى الابد امين ..