إلهنا هو الشخص الحقيقي اللي مليان تعزيات باقية ومستمرة .. مجداً ..

  هو نجانا و مازال يخلصنا للابد .. ليت الكثيرين يعرفونه فيخلصون .. امين 🙇🏻‍♂‍🙏

عايز احكي اختبار لمجد الرب .. اللي انقذني ومازال ينقذني دائماً .. 🙇🏻‍♂️

النهاردة خلصت شغلي و كنت مروح .. في موقف العربيات لاقيت زحمة رهيبة جداً ..

فعادي انا متعود بصلي يارب عايز عربية .. و على الارجح الرب بيرتب لي بوضوح اني اركب مرتاح ..

المهم .. لاقيت عربية مشروع صغيرة داخلة .. و ركبت جنب السواق ..

السواق كان عصبي و مؤذي جداً فوق العادة .. ولابس نظارة سوداء ومرعب للناس .. جميع اللي ركبوا كانوا صامتين تماماً من النقاش معاه او التجاوب ..

وكان بيسوق سواقة عصبية جداً و اتعارك مع كذا حد في السكة .. لدرجة ان في سواق تاكس نزل من عربيته يتعارك معاه ..

المهم في مثل هذه الظروف انا مش بصمت .. لكني بأعلن سيادة الرب على العربية والسواق .. 👉

و انا فعلاً عملت كدة .. لاني شعرت انه محاط بموت وتدمير .. !!😭

و كان بيجري بسرعة رهيبة .. و كان فخور بالسواقة بتاعته ..

لكن في لحظة خرجت عربية مشروع كبيرة جداً كانت طايرة جنبنا عن مسارها .. و دخلت تجاهنا مباشرة ..

في اللحظة دي .. اعتقد كان ممكن تبقى فيه كارثة حقيقية .. لكن لسبب مجهول للسواق .. لكنه معلوم لي وهو قدرة الرب وحياته اللي محاصرة عمري ..

سرعة عربيتنا بطأت فجأة و العربية الكبيرة تمالكت نفسها .. ورجعت بالتدريج لمسارها .. اتعارك السواقين عراك خفيف ..

المهم صاحبنا السواق .. كان وشه اصفر من الفزع و بيقولي " ده احنا كنا ها نموت .. ده ربنا حبيبي .. "

في اللحظة لفيت راسي ناحيته وابتسمت له .. و قولتله " اه فعلاً انت ربنا بيحبك " ..

بص لي بصة غريبة .. و رمى عينه ناحية الدبلة في ايدي ( بيصنفني في مخه ) .. ورفع النظارة وقالي .. تعرف انا كان زماني ميت اصلا من زماااان ..

قولتله احكي .. قالي يا باشا انا الناس كانوا بيجهزوا جنازتي و جابوا كفن .. والكفن لسة في الدولاب عندي ..

قلتله حصلك ايه .. قالي لا دي حاجة بسيطة .. انا وقعت من الدور الرابع .. و وراني جرح رهيب تحت الكم بتاعه متخيط ومتبهدل العظم بتاعه .. و قالي ده ولا حاجة من باقي جسمي و الجمجمة و العمود الفقري .. و انه قعد في غيبوبة لفترة طويلة .. لغاية لما اسرته طلبوا انه يتشال من جهاز الاستنشاق ..

لكن طبيب ظهر فجأة في القصة وقال سيبوا له ٤٨ ساعة و فعلاً رجع للحياة ..

قولتله انت كنت بتصلح حاجة او شغال محارة في الرابع .. بص لي تاني وقالي مش ها كذب عليك انا رميت نفسي من فوق ..

قولتله كنت بتتعاطى حاجة وقتها .. قالي لا حصلت لي حاجة مش عارفها .. قولتله اوصف .. قالي فجأة لاقيت كمية حزن رهيبة جوايا

( على فكرة هو كان بيتشتت كتير و بيخرج برة النقط المهمة .. لكني اتعلمت ان لو انا حاضر بالقصة قدام الرب على الارجح الشخص ها يفتكر احداث واضحة كان بيغفل عنها و ها يعرف يوصفها بوضوح و ها يستغرب انه عرف يعمل كدة .. لان على الارجح ابليس بيخفي عن عينه اهم التفاصيل اللي تخليه يفكر )

و كمل كلامه ان ده حزن كان شديد جداً و هو ما يعرفش ازاي كان بيحركه من غير ما يتحكم في نفسه .. انه يهرب من كل ده ويرمي نفسه و هو واعي ..!! ( طبعاً ده تأثير روح الموت اللي بيبقى معاه مجموعة من ارواح الحزن والانتحار والهوى مسكين الانسان بدون المسيح بيبقى وجبة سهلة لهم ) 😭😭

وقالي اول ما لمست الارض حسيت ان فيشة كهربا اتفصلت ما حسيتش بأي حد ..

وقالي انه حلم احلام اثناء الغيبوبة .. قولتله تقدر تفتكر ؟؟

قالي في حاجات شوفتها مش عارف اوصفها .. لكنه نجح يفتكر مشهد .. قالي انه كان في متاهة زي طريق مظلم جداً .. و فجأة ظهر قدام اشخاص اجسامهم زي البشر لكن رؤوسهم كانت تشبه الماعز .. وقالي انه كان مفزوع جداً و هما بيحاولوا يمسكوه .. ( الغريب ان ده هو رمز ع ب د ة الشيطان حالياً )

ف بص لي تاني و قالي هما مين دول يا باشا ؟؟ ( للاسف ابليس بيبقى عامل عمى على اذهان الناس في العالم لدرجة انهم مش بيعرفوه وهو قدامهم بيموتهم .. 😭😭)

قولتله دول شياطين .. و جايين ياخدوك على الجحيم بلا رجعة ..

قالي معقووول .. ؟؟ شياطين .. وبص لي و بدأت عينيه تدمع .. و كأنه فجأة شاف حقيقة في روحه .. 😭😭

قولتله عرفت ربنا بيحبك ليه .. كان ممكن تكون معاهم هناك .. و ما كونتش ها ترجع ابدا .. ربنا عطالك فرصة تانية اوعى تضيعها ..

قالي امال ايه اللي بيحصل معايا .. انا اتجوزت وقولت ربنا يهديني عن الاذى والشر اللي كنت فيه .. و حلمت بعيال اشيلهم ..

و اول ما شيلتهم على ايدي توأم .. بص لهم عيلتي بحسد .. ماتوا على ايدي في تاني يوم .. و من وقتها ما خلفتش ..

وهنا بدأ يطلع المنديل من علبة المناديل ويمسح دموعه فعليا و هو بيبص لي .. 😭😭

قولتله لو كملت تبص على ربنا اللي منحك فرصة تانية تعيش .. اكيد ها يعوضك ..

قالي انا نفسي ده حبيبي ..

حكيت معاه في تفاصيل كتير مش ها ذكرها هنا لانها كتيرة ..

سيبته و هو بيبص لي ومتعلق كأن روحه لاقيت شعرة نور في ظلمته ..

وصليت علشانه تاني و انا مروح .. و انا واثق ان ده كافي لان قصته باقت مع الرب ..

المهم .. هدفي من القصة دي .. ان اقولكم وجود المسيح في حياتكم ده كنز الكنوز .. مجرد ان قصتكم باقت قصة الرب .. انتم في مجد فائق ..

نعم هو نجانا و مازال يخلصنا للابد .. ليت الكثيرين يعرفونه فيخلصون .. امين 🙇🏻‍♂️🙏